生活投資Blog：第四十三集：工作的價值(三) - 活水基金網站　「你們往普天下去，向一切受造物宣傳福音。」(谷16：15)

《生活投資Blog》　講者：聖神內更新團體　|　第四十三集：工作的價值(三)

請等候片刻...

如遇問題，請按聯絡我們，讓我們盡快跟進。

Matthew：各位你哋好！我係更新團體的Matthew！

Flora：我係Flora。

Matthew：老婆呀！休息咗兩日，終於鬆咗啲，今日，我哋再講吓返工嘅目的，使我同大家返工都唔會再覺得係捱。

Flora：好呀！上星期，我哋講咗話工作係天主的設計，原本係一個祝福，我們亦要工作去養家！除咗呢兩個目的之外，天主設計我們哋要做嘢，仲有四個目的

Matthew：今日我哋再講兩個

Flora：跟住落嚟呢個目的就勁喇！工作培養我嘅品格！

Matthew：品格係人生嘅基礎。有好多人都係因為品格問題斷送自己嘅前途

Flora：天主用你份工，作為培養大家品格嘅場地、你品格的課室。好多人會覺得上司、老細或者啲客好難頂，其實喺你工作中所接觸到嘅人，佢哋係你生命中，令你將來可以上天堂嘅沙紙，磨靚你嘅品格。就算你嘅上司、老板或者客有錯，天主都想透過佢哋去教你，使你改變，咁做人都可以開心啲。有人遇到自己唔鍾意嘅上司，就會辭工。的確，大家隨時都可以揀唔做你份工，但你就唔會學識喺呢份工先學到嘅嘢。即使你返第份工，天主亦會再俾機會你，你會遇到另一個上司，呢個上司可能會仲差過上一個，因為天主想吸引你嘅注意力，嘗試去教好你

Matthew：的確，因為大家每日都長時間面對住工作，所以你可以喺你份工上學到嘅嘢，比你喺其他地方學到嘅嘢多好多。大家每日都會遇到好多挑戰，挑戰你係唔係一個誠實、可靠、忍耐、有自制力、熱心、靈活、開朗、公正、正直、自信、守時嘅人

Flora：早幾個星期，我搭的士嘅時候遇到一件事。嗰時條街塞緊車，當我坐緊架的士要過一盞紅綠燈嘅時候，後面另一架的士想插隊，但我架車嘅司機無讓佢，踩油過咗盞燈。點知嗰架想插隊嘅的士，司機亦踩油，攔係我坐緊架的士嘅前面，仲擰轉面向我坐緊架車嘅司機做咗個不文手勢，嗰時塞緊車，個場面都幾尷尬。但係我架車嘅司機無出聲，一路好平靜咁車我到去目的地。落車嘅時候，我讚個佢，話佢脾氣好，佢好開心，仲笑笑口叫我記得攞齊嘢。其實佢可以好嬲，俾人插隊，嘩！對方仲惡過佢，佢其實有權為啖氣，喺車廂度口up up咁發洩，又或者開窗鬧番人，有可能最終會大打出手，終於條氣可能更唔順。但佢無咁做，終於仲俾人讚，心情即刻唔同晒。的確，我哋每日工作咁長時間，一定會遇到不同嘅事，好多嘢仲會係唔如意嘅㖭。我哋唔可以選擇會遇到嘅事，但可以選擇面對嘅方法，後果可以好唔同

Matthew：的確，你從工作帶返屋企嘅嘢，其實並單止係你嘅糧，更重要嘅係你自己，你嘅品格，你嘅改變。如果你由工作帶貪心、忿怒、抱怨、擔憂、妒忌、計較、失望、負面返屋企，𢭃嗰份糧，換啲咁嘅嘢，影響家庭，影響你嘅人生，咁好唔抵。你揾工嘅時候，不單只諗：「呢份工出幾多糧？」亦應該諗：「呢份工會駛我變成點樣嘅人？」天主話，工作培養我嘅品格

Flora：除此之外，工作亦可以使人慷慨

Matthew：老婆，你上星期四講到，有好多人會計劃「提早退休」。但係想提早退休嘅人，你哋有無諗過，其實天主一直俾你有工作嘅能力，是為咗令你可以為其他人付出？大家有無諗過，天主令你可以繼續留喺呢份工，係想你付出更多？如果你無錢，你就無辦法施予。就好似早前四川地震同緬甸風災咁，「施比受更有福」，你有資源，就可以將慷慨嘅心化為行動

Flora：所以工作除了是天主嘅設計，使我哋有能力養家，培養我哋嘅品格，仲使我哋能夠慷慨施予，唔想人淨係諗自己，因為咁會好痛苦

Matthew：好喇，今日傾住咁多先。恭喜大家，聽日又可以小休一日，好好珍惜你嘅假期，陪吓你生命中最重要嘅人，聽晚11：05，我同Flora繼續同你講你工作嘅價值，返工點樣唔係捱

M/F：拜拜！

返回目錄